Radio Ishakwe

Uko Perezida Kagame yashatse kwica Dr Theogene Rudasingwa, igice cya 3 Mu biganiro bibiri bishize Radio Ishakwe yabagejejeho imwe mu migambi yo guhotora Dr. Theogene Rudasingwa nk'uko yashyirwaga mu bikorwa na Jenerali Dan Munyuza, ubu uyoboye igipolisi cy'u Rwanda. Hari ababajije bati ariko se hari amafaranga yohererejwe abicanyi koko? Igisubizo ni yego amafaranga yaroherejwe. Akayabo kajya muri ibyo bikorwa kanyuzwa muri za Ambasade, cyangwa kuri Rwanda Cash andi akazanwa n'intumwa mu mifuka no mizigo yazo. Bamwe mu bantu baba mu mahanga ariko bagahora za Kigali, harimo abakoreshwa iyo mirimo yo kuzana amikoro n'amarozi akoreshwa muri ibyo bikorwa by'ubwicanyi. Muri iki kiganiro turabigarukaho. Twibutse ko mu gice cya mbere cy'iki kiganiro cyahise ku wa 6 gashayantare 2020 mwari ku mwe na Dr. Theogene Rudasingwa, Bwana Joseph Ngarambe nanjye Sixbert Musangamfura, wakibagejejeho. Twabumvishije uruhare rwa René Rutagungira muri za gahunda zo kwica Abanyarwanda mu mahanga, tubumvisha aho Kagame yamuririraga yarafatiwe mu gihugu cy'Ubugande, ndetse mwumva n'amajwi ya Jenerali Dan Munyuza mu migambi yo kwica Dr Rudasingwa, bahimbye Rukara bayobya uburari.   Mu gice cya kabiri cyahise ejo ku wa 13 gashyantare 2020 mwumvise na none aho Dan Munyuza atanga amabwiriza ajyanye no kuzamugongesha ikamyo cyangwa kumwicira mw'icumbi bakajya kujugunya umurambo i Kantarange. Uyu munsi turakomeza tubumvisha andi majwi ajyanye no guciririkanya amafaranga no kuyohereza. Muri kumwe na Joseph Ngarambe na Sixbert Musangamfura.

Uko Kagame yateguye kwica Dr Theogene Rudasingwa, igice cya 2 13 Gashyantare 2020 Ku wa 6 Gashyantare 2020 twabagejejeho ikiganiro cya mbere muri byinshi bizakomeza kwerekana ukuntu ingoma y'igitugu ya Perezida Paul Kagame ikomeje gutegura umugambi mubisha wo kwivugana Dr. Theogene Rudasingwa, umuyobozi mukuru w'ISHAKWE Rwanda Freedom Movement. Icyo gihe twibukije uruhare rwa René Rutagungira, wahoze arinda Jenerali James Kabarebe nyuma agahungira Uganda, agafungwa kubera ibikorwa by'ubwicanyi n'ubutasi, bikarangira Perezida Kagame akoresheje ingufu nyinshi kugira ngo afungurwe. Uwo Rutagungira niwe watumwe gushaka mu bo bakoranaga barinda umuhezanguni Kabarebe, uwashobora kubafasha gushaka abicanyi. Twabumvishije amajwi y'umuhezanguni Jenerali Dan Munyuza avuga ko uwo bahimbye Rukara yagombaga kwicwa ndetse bakagura n'ibitambaro byinshi kugira ngo hatagira amaraso agaragara aho bamuhotoreye. Muribuka Kagame avuga kuri Rutagungira abeshya ko nyina yaje kumutabaza kandi nyina yarishwe muri jenoside yakorewe Abatutsi muri 1994, akagwa i Gahanga, i Kigali. Turabumvisha aho Dan Munyuza yatangaga amabwiriza y'amafaranga yo kwishyura umushoferi w'i Kamyo, ukomoka muri Rumaniya, yagombaga kugonga imodoka itwaye Dr Theogene Rudasingwa, bakamuhuhura aramutse adashizemo umwuka.  Turabumvisha kandi aho yaganiraga n'uwo yatumaga ukuntu ikindi gihe bateguraga kumwica akinjira mu gihugu cy'Ububiligi ntawe urabutswe, ibyangombwa bye na telefoni ze bakajya kubijugunya mu kindi gihugu kugira ngo bayobye iperereza. Ibi biganiro tuzabikomeza tubumvisha andi majwi kuri iyi migambi mibisha bityo Abanyarwanda barusheho kumenya ababayobora uko batekereza n'uko bakora. Ikiganiro murakigezwaho na Sixbert Musangamfura, Umunyamabanga mukuru w'Ishakwe Rwanda Freedom Movement  

UKO PEREZIDA KAGAME YATEGUYE KWICA DR. THEOGENE RUDASINGWA Dr. Theogene Rudasingwa kuva yahunga igitugu cya Paul Kagame ntiyigeze agoheka ngo yibagirwe ko ahigwa bukware n'uwo bahoze bakorana bya hafi cyane ari magara ntunsige.  Imigambi yo kumuhitana ni myinshi kandi na n'ubu iracyakomeza kuko hari ibimenyetso bifitiwe gihamya bibigaragaza. Ariko uyu munsi turagira ngo adusobanurire uko yarusimbutse muri 2015 nk'uko bikubiye mu gitabo aherutse gusohora cyitwa "President Kagame's plot to assassinate me: top secret Rukara files revealed" (Umugambi wa Perezida Kagame wo kunyica: amadosiye y'ubutasi bw'ibanga rikomeye yitiriwe Rukara yarasohotse). Muri ayo madosiye harimo na wa mwicanyi ruharwa René Rutagungira wari warafatiwe muri Uganda akaza kurekurwa kubera inyungu za politiki n'imishyikirano hagati y'ibihugu byombi. Hari abibajije impamvu ikomeye yatuma Kagame asuka amarira, agahumeka insigane nk'uwataye akanigi ke, avuga ko Uganda igomba kurekura René Rutagungira cyangwa bakazabyenga iminyagara. Impamvu nyamukuru ni uko uwo musore ari umwe muboherezwa kwica abatavuga rumwe na Kagame bahungiye mu mahanga. Muri ayo madosiye harimo amajwi ya Rukarabankaba Jenerali Dan Munyuza, uyobora polisi y'u Rwanda muri iki gihe, ariko akaba ari we wari ushinzwe guhuza ibikorwa byose by'umugambi mubisha wo guhotora Dr. Theogene Rudasingwa, akanabishoramo akayabo k'amadolari menshi yahabwaga na Shebuja Perezida Paul Kagame. Dr. Rudasingwa nakomeza guhirwa, azamera nka ya nkware y'inyabugingo itora mw'itongo ry'uwayihigaga. Umutumire muri iki kiganiro ni Dr. Theogene Rudasingwa. Murakigezwaho na Sixbert Musangamfura hamwe na Joseph Ngarambe.

GUSOZA UMWAKA 2019, TUREBA IMBERE UW’2020 Mu kiganiro cy’uno munsi turagaruka ku bintu bitandukanye byabaye mu mwaka turiho dusoza w’2019, haba kw’Isi yose, mu Rwanda, mu karere, cyangwa se mu mashyaka ahanganye na FPR/DMI KAGAME. Ku buryo bw’umwihariko, uno mwaka wagendekeye ute Ishyaka ryacu ISHAKWE-RFM ? Ubutumwa ku bayoboke baryo ? Umwaka w’2020 dukozaho imitwe y’intoki waba uduhishiye iki haba ku Rwanda rwacu cyangwa mu karere rubarizwamo ? Ubutumwa ku Banyarwanda, ku bayoboke ba ISHAKWE-RFM : haba hari icyizere cyo gutsinda urugamba rwo gushaka impinduka mu Rwanda ruyogojwe na FPR/DMI KAGAME ? Umutumirwa : Dr Theogene RUDASINGWA Uwateguye ikiganiro : Joseph NGARAMBE 28 12 2019

Abo mu muryango wa Ben RUTABANA bakomeje gushinja ku mugaragaro Jenerali KAYUMBA NYAMWASA ishimutwa rye. Muri kino kiganiro turibanda ku biherutse gutangazwa na Madamu Emerence KAYIJUKA, undi mushiki wa Ben RUTABANA, akaba na we ari mu basinye ibaruwa  yo kw’itariki ya 02/10/2019, yandikiwe Jerome NAYIGIZIKI, nk’umuhuzabikorwa wa RNC. Madamu Emerence KAYIJUKA na we arunga mury’abo mu muryango basinyanye iyo baruwa, twumvise mu kiganiro gishize, ari bo Louis RUGAMBAGE, Tabitha GWIZA na Adeline RWIGARA. Hagati aho, akazu ka FPR/DMI Kayumba gakomeje kugurumana. Ikimenyetso nyamukuru ni iyirukanwanwa rya Jean-Paul TURAYISHIMYE, umwe mu bantu 10 bashinze RNC, akaba kugeza ubu yari inkoramutima ya KAYUMBA Nyamwasa n’inkingi ya mwamba ya FPR/DMI ye. Ntawakwibagirwa intambara ikomeje muri RNC, Intara ya Canada, aho bamwe mu bayobozi bayo (barimo n’abo mu muryango wa Ben RUTABANA) birukanywe bakabyanga, ndetse bikaba bimaze kugaragara ko mu byo Jean-Paul TURAYISHIMYE yazize harimo kuba yaritandukanije n’icyemezo cyo gutoteza abaharanira ko ikibazo cya Ben RUTABANA kibonerwa igisubizo. Mbese nyirabayazana KAYUMBA Nyamwasa we azavuga ryari ku mugaragaro kubyo ashinjwa mw’ishimutwa rya Ben RUTABANA? Abateruzi b’ibibindi bazamukingira ikibaba kugeza ryari? Umutumirwa Jonathan MUSONERA Uwateguye ikiganiro: Joseph NGARAMBE 04 12 2019