ព្រឹត្តិការណ៍អន្តរជាតិប្រចាំថ្ងៃ
Verfügbare Folgen
5 von 24
- ព្រឹត្តិការណ៍អន្តរជាតិប្រចាំថ្ងៃ - អង្គការសុខភាពពិភពលោក ចាត់ទុក មេរោគកូវីដបំប្លែងខ្លួន អូមីក្រុង ជាហានិភ័យខ្ពស់ខ្លាំងបិទព្រំប្រទល់វិញ ពង្រឹងវិធានការជាថ្មី ... ពិភពលោកបន្តជ្រួលច្របល់ និងព្រួយបារម្ភកាន់តែខ្លាំងឡើងៗ នៅចំពោះមុខការរីករាលនៃមេរោគកូវីដបំប្លែងខ្លួនថ្មីអូមីក្រុង។ ប្រឈមនឹងស្ថានភាពបែបនេះ ក្រុមប្រទេសមហាឧស្សាហកម្មបានបើកជំនួបប្រជុំបន្ទាន់នៅថ្ងៃ ចន្ទទី ២៩វិច្ឆិកានេះ នៅទីក្រុងឡុងដ៍ ដើម្បីពិភាក្សាពីការវិវឌ្ឍរបស់អូមីក្រុង។ ចំណែកអង្គការសុខភាពពិភពលោកបានប្រកាសថា អូមីក្រុង ជាតំណាងហានិភ័យ ខ្ពស់ខ្លាំង សម្រាប់ពិភពលោក។ អូមីក្រុង មេរោគកូវីដបំប្លែងខ្លួនថ្មីលេចឡើងនៅប្រទេសអាហ្វ្រិកខាងត្បូង កាលពីប៉ុន្មានថ្ងៃមុននេះ ត្រូវបានអង្គការសុខភាពពិភពលោក ចាត់ទុក ជាមេរោគ ដ៏គួរព្រួយបារម្ភ ខ្លាំងណាស់សម្រាប់ពិភពលោកទាំងមូល។ ខ្លាំងពុំធ្លាប់មានទេ គិតតាំងពីមានលេចមេរោគកូវីដបំប្លែងខ្លួនដែលតាមក។ ប៉ុន្តែគេនៅពុំទាន់ដឹងជាប្រាកដថាតើ អូមីក្រុង កំណាច ឆ្លងខ្លាំងឬមិនសូវឆ្លង ជាងដែលតា និងមេរោគបំប្លែងមុនៗ កំរិតណាឡើយ។ នៅក្នុងឯកសារបច្ចេកទេស ចេញផ្សាយនៅថ្ងៃចន្ទទី២៩វិច្ឆិកានេះ អង្គការសុខភាពពិភពលោកបានត្រឹមបញ្ជាក់ថា បើយោលទៅតាមសភាពនៃការបំប្លែងខ្លួន អូមីក្រុង ទំនងជាខ្លាំង អាចគេចនិងយកឈ្នះលើប្រព័ន្ធភាពស៊ាំរបស់មនុស្សបាន ហើយទំនងជាអាចមានសមត្ថភាពចម្លងខ្លាំងទៀត។ ប្រូបាប៊ីលីតេនៃការរីករាលដាលនៅលើពិភពលោកអាចខ្ពស់ខ្លាំង។ ហើយបើតាមទិន្នន័យបឋម អូមីក្រុង មានសញ្ញាហានិភ័យខ្ពស់អាចឆ្លងលើអ្នកធ្លាប់ឆ្លងទៀតបាន។ ដើម្បីបានដឹងជាក់លាក់អំពីអំណាចចម្លង ភាពកំណាចរបស់អូមីក្រុង និងទស្សន៍ទាយបានអំពីការរាតត្បាតរបស់អូមីក្រុងនៅលើពិភពលោក និងកំណត់អត្តសញ្ញាណពិតប្រាកដរបស់អូមីក្រុងបាន គេត្រូវការពេលវេលាជាច្រើនសប្តាហ៍ទៀត។ ក្រុមអ្នកស្រាវជ្រាវអ៊ីតាលីនៃមន្ទីរពេទ្យ Bambino Gesu ដ៏ល្បីនៅក្រុង Rome បានផ្សព្វផ្សាយរូបភាពដំបូង របស់ អូមីក្រុង ថាមានការបំប្លែងខ្លួនច្រើនដងជាងមេរោគបំប្លែងដែលតា ខ្លាំងណាស់ តែគេត្រូវការសិក្សាបន្ថែមជាច្រើនទៀត មុននឹងអាចកំណត់បានថាតើមេរោគ អូមីក្រុង កាចឬមិនកាច ឆ្លងខ្លាំងឬមិនសូវ និងធ្វើអាចធ្វើឱ្យអ្នកជំងឺធ្លាក់ខ្លួនឈឺធ្ងន់កំរិតណានោះ។ មកទល់ពេលនេះ ពុំទាន់មានករណីស្លាប់ដោយអូមីក្រុងទេ តែមេរោគបំប្លែងខ្លួនថ្មីបន្តបង្ហាញវត្តមាននៅក្នុងប្រទេសកាន់តែច្រើនឡើងៗ ជារៀងរាល់ថ្ងៃ និងជារៀងរាល់ម៉ោង។ នៅអាហ្វ្រិកខាងត្បូងទីដែលលេចអូមីក្រុងដំបូង ក្រុមអ្នកជំនាញព្យាករថានឹងមានករណីឆ្លងថ្មីជាង១ម៉ឺននាក់ក្នុងមួយថ្ងៃ នៅសប្តាហ៍ខាងមុខ។ បិទព្រំដែន គ្មានប្រសិទ្ធភាព អង្គការសុខភាពពិភពលោក បានរំលឹកហើយរំលឹកទៀតថា ការបិទព្រំដែន មិនមែនជាមធ្យោបាយទប់ស្កាត់ការរីករាលដាលនៃកូវីដ ប្រកបដោយប្រសិទ្ធភាពទេ។ ក្នុងអារម្មណ៍ថារងទណ្ឌកម្ម ដោយសារភាពស្មោះត្រង់ប្រកាសប្រាប់ពីមេរោគកូវីដបំប្លែងខ្លួនថ្មី ប្រទេសអាហ្វ្រិកខាងត្បូងផ្ទាល់ ក៏បានអំពាវនាវឱ្យគ្រប់ប្រទេសទាំងបើកចំហព្រំដែន វិញ ភ្លាមនិងជាបន្ទាន់។ ប៉ុន្តែគ្រាន់តែបានទទួលដំណឹងពីអាហ្វ្រិកខាងត្បូងថាបានរកឃើញមេរោគកូវីដបំប្លែងខ្លួនថ្មី អូមីក្រុង ភ្លាម បណ្តាប្រទេសនៅទ្វីបអឺរ៉ុប សហរដ្ឋអាមេរិក អ៊ីស្រាអែល .... បានប្រកាសបិទជើងហោះហើរមកពីអាហ្វ្រិកខាងត្បូងភ្លាម។ ឥលូវមានប្រទេសជាច្រើនបន្ថែមទៀត បានសម្រេចបិទការហោះហើរជាមួយអាហ្វ្រិកខាងត្បូង និងអាហ្វ្រិកមួយចំនួន។ ហើយមានប្រទេសខ្លះទៀត សម្រេចបិទព្រំប្រទល់វិញតែម្តង មានជាអាទិ៍ ជប៉ុន។ បន្ធូរបន្ថយវិធានការបានបីសប្តាហ៍ ជប៉ុនបានប្រកាសបិទព្រំដែនមិនទទួលទេសចរបរទេសវិញ ចាប់ពីថ្ងៃអង្គារទី ៣០វិច្ឆិកាទៅ។ អូស្ត្រាលីប្រកាសលើកពេលបើកព្រំដែនទទួលនិស្សិតនិងពលករបរទេស ដែលគ្រោងបើកចាប់ពីថ្ងៃទី ១ធ្នូទៅ។ ហ្វីលីពីនក៏ផ្អាកផែនការបើកប្រទេសទទួលភ្ញៀវទេសចរបរទេសចាក់ថ្នាំបង្ការរួចមួយរយៈសិនទៀតដែរ។ ម៉ារ៉ុក សម្រេចបិទព្រំដែនផ្អាកទំនាក់ទំនងផ្លូវអាកាសទាំងស្រុងតែម្តង រយៈពេលពីរសប្តាហ៍ ចាប់ពីស្អែកទៅ ដោយសំអាងថាប្រទេសគ្រប់គ្រងកូវីដបានល្អហើយ មិនចង់ឱ្យរលកចម្លងថ្មីកើតឡើងទៀតទេ។ នៅអឺរ៉ុប រដ្ឋមន្ត្រីក្រសួងសុខាភិបាលនៃក្រុមប្រទេសមហាឧស្សាហកម្មG៧ បារាំង អង់គ្លេស អាមេរិក ជប៉ុន កាណាដា និងអ៊ីតាលី បានបើកប្រជុំបន្ទាន់នៅក្រុងឡុងដ៍ថ្ងៃនេះ ដើម្បីពិភាក្សាអំពីដំណើរវិវឌ្ឍរបស់អូមីក្រុង។ ក្នុងប្រទេសដែលរកឃើញមានករណីកូវីដអូមីក្រុង មកដល់ហើយ អាជ្ញាធរសុទ្ធតែបានរឹតបន្តឹងវិធានការឡើងវិញ។ ថ្វីបើបារាំងគ្មានគម្រោងបិទព្រំដែនផ្ទៃក្នុងអឺរ៉ុបទាំងស្រុងមែន តែបារាំងតម្រូវឱ្យអ្នកជាប់ពាក់ព័ន្ធនឹងករណីវិជ្ជមានអូមីក្រុង ត្រូវធ្វើចត្តាឡីស័ក ទោះបានចាក់វ៉ាក់សាំងពេញលេញហើយក៏ដោយ។ នៅអង់គ្លេស អ្នកដំណើរបរទេសត្រូវធ្វើតេស្តកូវីដ នៅពីរថ្ងៃក្រោយមកដល់ និងត្រូវនៅដាច់ដោយឡែកពីគេ ក្នុងពេលរង់ចាំលទ្ធផល។ អូមីក្រុង និង វ៉ាក់សាំង មិនទាន់ស្គាល់អត្តសញ្ញាណពិតប្រាកដរបស់អូមីក្រុង គេក៏នៅមិនទាន់ដឹងថាតើវ៉ាក់សាំងដែលពិភពលោកមានប្រើនាពេលបច្ចុប្បន្ននេះ អាចការពារនិងកំរិតការឆ្លងអូមីក្រុង ហើយបើឆ្លងតើវ៉ាក់សាំងអាចការពារមិនឱ្យធ្លាក់ខ្លួនឈឺធ្ងន់បានប៉ុនណា ឬក៏គ្រាន់តែមានរោគសញ្ញាខ្លាំង។ ប៉ុន្តែខាងមន្ទីរពិសោធន៍ឱសថ មិនថាក្រុមហ៊ុន AstraZeneca Pfizer/BioNtech Moderna និងNovavax ទេ សុទ្ធតែប្រកាសអះអាងថាមានទំនុកចិត្តលើសមត្ថភាពសម្រួលវ៉ាក់សាំងប្រឆាំងកូវីដរបស់ខ្លួនបាន សម្រាប់យកទៅទប់ទល់នឹងអូមីក្រុង។ បើតាមលោកស្រីប្រធានគណៈកម្មការអឺរ៉ុប មន្ទីរពិសោធន៍នីមួយៗត្រូវការពេលវេលាយ៉ាងហោចពីរទៅ២សប្តាហ៍ ទើបអាចសម្រេចបានថាត្រូវកែសម្រួលវ៉ាក់សាំងរបស់ពួកគេឬអត់។ ក្នុងពេលរង់ចាំ ប្រទេសខ្លះបានជំរុញនិងពន្លឿនយុទ្ធនាការចាក់ថ្នាំ បង្ការ ដូសទីបី ហើយវិធីការពារនិងទប់ទល់ដ៏ប្រសើរជាងគេ ដើម្បីបានចំណេញពេលវេលា និង កុំឱ្យការចម្លងរាតត្បាត ស្ទុះឡើងលឿនខ្លាំង គឺគ្មានអ្វី ក្រៅពីបង្កើនការប្រុងប្រយ័ត្នទ្វេឡើង និងបន្តប្រកាន់ខ្ជាប់វិន័យការពារខ្លួន ដោយ ពាក់ម៉ាស់ ក្នុងទីបិទជិត ក្នុងទីប្រជុំជន រក្សាគន្លាត ឧស្សាហ៍បើកទ្វារបង្អួចផ្ទះសម្បែងការិយាល័យធ្វើការ ដើម្បីឱ្យប្តូរផ្លាស់ខ្យល់បរិយាកាស៕11/29/20217:05
- ព្រឹត្តិការណ៍អន្តរជាតិប្រចាំថ្ងៃ - អន្តោប្រវេសន៍នៅច្រកសមុទ្ទបារាំង-អង់គ្លេស ៖ អឺរ៉ុបជួបប្រជុំគ្នាដោយគ្មានអង់គ្លេសបួនថ្ងៃក្រោយសោកនាដកម្មស្លាប់ជនអន្តោប្រវេសន៍២៧នាក់ នៅច្រកសមុទ្ទManche ដែលខណ្ឌចែកបារាំងនិងអង់គ្លេសមក នៅថ្ងៃអាទិត្យនេះ អឺរ៉ុបបានរៀបចំបើកជំនួបប្រជុំមួយ ដែលដឹកនាំដោយបារាំង ដើម្បីពង្រឹងការប្រយុទ្ធប្រឆាំងនឹងបណ្តាញជួញដូរមនុស្ស។ ប៉ុន្តែអង់គ្លេសដែលជាទិសដៅរបស់ជនអន្តោប្រវេសន៍ មិនត្រូវបានបារាំងអញ្ជើញឱ្យមកចូលរួមប្រជុំជាមួយទេ។ នៅថ្ងៃអាទិត្យទី ២៨វិច្ឆិកានេះ បារាំងត្រូវដឹកនាំបើកកិច្ចប្រជុំមួយនៅទីក្រុង កាឡេ ដើម្បីរកវិធីដោះស្រាយវិបត្តិអន្តោប្រវេសន៍ឆ្លងសមុទ្ទ Manche ដែលជាព្រំដែនខ័ណ្ឌចែកបារាំងនិងអង់គ្លេស ដោយពុំមានភាគីអង់គ្លេសចូលរួមទេ ទោះបីជាអង់គ្លេសជាភាគីពាក់ព័ន្ធដ៏ចំបងបំផុតក៏ដោយ។ បារាំងប្តូរចិត្ត នៅទីនាទីចុងក្រោយ លុបការអញ្ជើញភាគីអង់គ្លេស ដោយហេតុតែមិនពេញចិត្តនឹងពាក្យសំដីនិងទង្វើរបស់នាយករដ្ឋមន្ត្រីអង់គ្លេស។ ក្រោយសោកនាដកម្មស្លាប់ជនអន្តោប្រវេសន៍២៧នាក់ កាលពីថ្ងៃពុធទី ២៤វិច្ឆិកាភ្លាម នាយករដ្ឋមន្ត្រីអង់គ្លេស បានបង្ហោះលិខិតជាសាធារណៈ តាមប្រព័ន្ធសង្គម សុំឱ្យបារាំងទទួលយកវិញនូវអន្តោប្រវេសន៍ ដែលឆ្លងទៅដល់អង់គ្លេសដោយខុសច្បាប់។ ប្រធានាធិបតីបារាំងក៏បានឆ្លើយតបវិញ ថាលោកចនស៊ុន ប្រើវិធីមិនប្រាកដប្រជា ព្រោះ ក្នុងនាមជាប្រមុខដឹកនាំរដ្ឋ-រដ្ឋាភិបាល គេមិនសម្តែងសារតវាគ្នាអ្វីតាមប្រព័ន្ធសង្គមនិងជាសាធារណៈបែបនេះទេ។ ចំណែករដ្ឋមន្ត្រីក្រសួងមហាផ្ទៃបារាំង ក៏សម្រេចមិនជួបមុខសមភាគីអង់គ្លេស និងបានបញ្ជាក់ប្រាប់យ៉ាងច្បាស់ទៅវិញ លុបការអញ្ជើញរដ្ឋមន្ត្រីក្រសួងមហាផ្ទៃអង់គ្លេសមកក្នុងជំនួបប្រជុំ ដោយពន្យល់ថាបារាំងខកចិត្តខ្លាំងណាស់ នឹងពាក្យសំដីរបស់នាយករដ្ឋមន្ត្រីអង់គ្លេស ហើយរបៀបទាមទាររបស់លោកមានលក្ខណៈអាក្រក់បំផុត។ អង់គ្លេសត្រូវគ្រប់គ្រងព្រំដែនដោយខ្លួនឯង ជាជំនួបប្រជុំថ្នាក់រដ្ឋមន្ត្រីក្រសួងមហាផ្ទៃអឺរ៉ុប ចាប់បើកនៅវេលាម៉ោង១៥ បានការចូលរួមពីសំណាក់រដ្ឋមន្ត្រីក្រសួងមហាផ្ទៃអាល្លឺម៉ង់ ហូឡង់ បែលហ្សិក ព្រមទាំងស្នងការសហភាពអឺរ៉ុបទទួលបន្ទុកកិច្ចមហាផ្ទៃ និងភ្នាក់ងារនគរបាលប្រឆាំងឧក្រិដ្ឋកម្មអឺរ៉ុប Interpol ភ្នាក់ងារការពារព្រំដែនអឺរ៉ុប Frontex។ កម្មវត្ថុចំបងនៃជំនួបប្រជុំ គឺស្វែងរកវិធីប្រយុទ្ធប្រឆាំងនឹងបណ្តាញរត់ពន្ធអន្តោប្រវេសន៍ និងបណ្តាញក្រុមឈ្មួញកណ្តាលដែលរកស៊ីជួញដូរមនុស្ស/អន្តោប្រវេសន៍។ ពោលគឺ បារាំងចង់ពង្រឹងកិច្ចសហប្រតិបត្តិការប្រយុទ្ធប្រឆាំងនឹងបណ្តាញជួញដូរមនុស្ស ប្រទាក់ក្រឡាគ្នា ព្រោះបណ្តាញជួញដូរអន្តោប្រវេសន៍ជាបណ្តាញអន្តរជាតិ ដែលធ្វើសកម្មភាពនៅតាមប្រទេសផ្សេងៗគ្នារបស់អឺរ៉ុប។ អឺរ៉ុបនិងបារាំងចាប់អារម្មណ៍លើដំណោះស្រាយបីចំណុច ៖ ប្រទេសបួន គឺ បារាំង ប៊ែលហ្សិក ហូឡង់ និងអាល្លឺម៉ង់នឹងសេចក្តីសម្រេចធ្វើប្រតិបត្តិការរួមគ្នា។ ចំណែកសហភាពអឺរ៉ុប នឹងផ្តល់ការគាំទ្រក្នុងយុទ្ធនាការប្រយុទ្ធប្រឆាំងនឹងបណ្តាញឈ្មួញកណ្តាលនៃជំនួញ មនុស្ស ដោយបង្កើនប្រតិបត្តិការ និងការផ្តោះប្តូរព័ត៌មានគ្នា។ ហើយជាចុងក្រោយ សហភាពអឺរ៉ុបនឹងជួយការពារ និងឃ្លាំមើលអន្តោប្រវេសន៍ដែលចង់ជ្រៀតចូលក្នុងទឹកដីអឺរ៉ុប តាមបណ្តាប្រទេសជាព្រំដែនអឺរ៉ុបខាងក្រៅ។ ចឹងហើយបានជាក្នុងជំនួបប្រជុំនេះ គេឃើញមានវត្តមាននាយកទីភ្នាក់ងារប៉ូលិសព្រំដែនអឺរ៉ុបFrontex ដែលមាននាទីជាការពារព្រំដែនគោក និងទឹក ឆ្នេររបស់អឺរ៉ុប។ ជាមួយអង់គ្លេសវិញ ស្នងការអឺរ៉ុបទទួលបន្ទុកកិច្ចការអន្តោប្រវេសន៍ លោក Margaritis Schinas បានថែមទាំងអះអាងដោយត្រង់ៗតែម្តងថា ដល់ពេលដែលអង់គ្លេសត្រូវទទួលខុសត្រូវគ្រប់គ្រងព្រំដែនខ្លួនឯងហើយ ព្រោះពេលនេះ អង់គ្លេសមិនមែនជាសមាជិកសហភាពអឺរ៉ុបទៀតទេ។ គេនៅចងចាំបានថា ពាក្យស្លោកដ៏សំខាន់មួយនៃការដើរចេញពីអឺរ៉ុប គឺ អង់គ្លេសត្រលប់មកគ្រប់គ្រងខ្លួនឯងវិញ។ ឥលូវអង់គ្លេសបានបែកចេញពីអឺរ៉ុបហើយ ដូច្នេះ ត្រូវចាប់ផ្តើមគ្រប់គ្រងខ្លួនឯងទៅ។ នេះជាប្រសាសន៍របស់លោកស្នងការរងអឺរ៉ុប នៅចំពោះអ្នកកាសែត។ ដោះស្រាយវិបត្តិគឺបង្កើនការបង្ក្រាប ? ប្រឈមនឹងស្ថានភាពបែបនេះ ក្រុមសមាគមជួយជនអន្តោប្រវេសន៍ ដែលបានចេញសេចក្តីអំពាវនាវនៅល្ងាចមិញ ឱ្យអាជ្ញាធរមានចំណាត់ការច្បាស់លាស់ ស្វែងរកការចរចាដើម្បីបើកផ្លូវស្របច្បាប់និងសុវត្ថិភាពដល់ជនអន្តោប្រវេសន៍ គ្មានសុទិដ្ឋនិយមថាជំនួបប្រជុំអាចសម្រេចដោះស្រាយបញ្ហាអ្វីចេញបានទេ ក្រៅអំពីសម្រេចចាត់វិធានការបង្កាប ក្រោមផ្លាកការពារសន្តិសុខ៕11/28/20215:26
- ព្រឹត្តិការណ៍អន្តរជាតិប្រចាំថ្ងៃ - កូវីដបំប្លែងខ្លួន « Omicron » កំពុងធ្វើឲ្យពិភពលោកផ្អើលជ្រួលច្របល់ ទោះមិនទាន់ដឹងថាវាគ្រោះថ្នាក់កម្រិតណាកូវីដបំប្លែងខ្លួនថ្មីមួយទៀត ដែលមានប្រភពចេញពីតំបន់អាហ្វ្រិកខាងត្បូង កំពុងតែធ្វើឲ្យមានការព្រួយបារម្ភ នៅទូទាំងពិភពលោក។ កូវីដបំប្លែងខ្លួនថ្មីនេះ ត្រូវបានអង្គការសុខភាពពិភពលោក ដាក់ឈ្មោះហៅថា អូមីក្រុង។ អ្នកជំនាញអះអាងថា សម្រាប់ពេលនេះ គេនៅមិនទាន់អាចដឹងបានទេ ថាកូវីដអូមីក្រុង មានកម្លាំងឆ្លងរាលដាល និងអាចបង្កហានិភ័យដល់សុខភាព ខ្លាំងកម្រិតណានោះ។ តែយ៉ាងណា សម្រាប់ពេលនេះ មានប្រទេសកាន់តែច្រើន បានចាប់ផ្តើមចេញវិធានការ ហាមឃាត់ការធ្វើដំណើរ មកពីប្រទេសមួយចំនួន នៅតំបន់ខាងត្បូងទ្វីបអាហ្វ្រិក។ ២ថ្ងៃមកនេះ វត្តមានរបស់កូវីដបំប្លែងខ្លួនថ្មីមួយប្រភេទទៀត ត្រូវបានគ្រប់គ្នាទន្ទិញជាប់មាត់តែម្តង។ កូវីដថ្មី ដែលមានអត្តសញ្ញាណ B.1.1.529 នេះ ត្រូវបានអ្នកជំនាញអង្គការសុខភាពពិភពលោក សម្រេចហៅឈ្មោះជាផ្លូវការថា កូវីដអូមីក្រុង (Omicron)។ វាត្រូវបានគេធ្វើតេស្តវិភាគ រកឃើញដំបូងបង្អស់ នៅប្រទេសអាហ្វ្រិកខាងត្បូង កាលពីថ្ងៃទី២៤វិច្ឆិកា។ ហើយនៅថ្ងៃសុក្រម្សិលមិញ អង្គការសុខភាពពិភពលោក បានចាត់ទុក កូវីដអូមីក្រុងនេះ គឺអាចជាប្រទេសបំប្លែងខ្លួនថ្មី ដែលគួរឲ្យបារម្ភ និងប្រុងប្រយ័ត្នខ្ពស់។ វិធានការបិទខ្ទប់ការធ្វើដំណើរ មកពីប្រទេសតំបន់ខាងត្បូងអាហ្វ្រិក គ្រាន់តែដំណឹងនេះលេចឮភ្លាម ប្រទេសជាច្រើន បានចាប់ផ្តើមចេញវិធានការរិតបន្តឹងការធ្វើដំណើរ មកពីប្រទេសប្រមាណជា១០ប្រទេស ស្ថិតនៅភាគខាងត្បូងអាហ្វ្រិក មានដូចជា ប្រទេសអាហ្វ្រិកខាងត្បូង ម៉ាឡាវី បុតស្វាណា ហ្ស៊ីមបាវ៉េ ណាមីប៊ី ឡេសូតូ និង ម៉ូហ្សំប៊ិក ជាដើម។ អាមេរិក កាណាដា ប្រេស៊ីល បានហាមឃាត់ ការធ្វើដំណើរមកពីប្រទេសទាំងនេះ។ នៅអឺរ៉ុបវិញ ក៏ដូចគ្នាដែរ បារាំង អង់គ្លេស អ៊ីតាលី ស្វ៊ីស ជាដើម បានចេញវិធានការចូលជាធរមានភ្លាមៗតែម្តង ហាមឃាត់ និងពិនិត្យយ៉ាងតឹងតែបំផុត ចំពោះអ្នកដំណើរដែលមកពីប្រទេសតំបន់អាហ្វ្រិកខាងត្បូងទាំងអស់។ ដោយឡែក ជប៉ុនវិញ បានដាក់កំហិត ឲ្យធ្វើចត្តាឡីស័ក ១០ថ្ងៃ ទៅលើអ្នកដំណើរ ដែលមកពីតំបន់នេះ។ ដំណឹងទាំងអស់នេះ បានធ្វើឲ្យមានបញ្ហាចលាចលខ្លាំងណាស់ នៅអាហ្វ្រិកខាងត្បូង ដោយម្នាក់ប្រញ៉េបប្រញ៉ាប់ធ្វើដំណើរចេញ មុននឹងជាប់ទៅណាមិនរួច។ នៅព្រឹកថ្ងៃសោរ៍ទី២៧វិច្ឆិកា នៅព្រលានយន្តហោះក្រុងអាំស្ទែរដាំ ប្រទេសហូឡុង គេបានបានធ្វើតេស្តរកឃើញវិជ្ជមានកូវីដ ចំនួន៦១នាក់ ក្នុងចំណោមអ្នកដំណើរដែលមកពីប្រទេសអាហ្វ្រិកខាងត្បូង ប្រមាណ៦០០នាក់។ ឥឡូវពេលនេះ គេកំពុងតាមដានបន្តទៀត ថាតើក្នុងចំនោម ករណីវិជ្ជមាន៦១ករណីនេះ អាចមានកូវីដអូមីក្រុងដែរឬទេ។ គិតមកត្រឹមពេលនេះ ក្រៅពីនៅអាហ្វ្រិកខាងត្បូង គេបានរកឃើញករណីវិជ្ជមានកូវីដអូមីក្រុង នៅប្រទេសម៉ាឡាវី នៅអ៊ីស្រាអែល នៅបុតស្វាណា នៅហុងកុង និងនៅប៊ែលហ្ស៊ិក មួយករណីដែរ។ ចំពោះករណីនៅប៊ែលហ្ស៊ិក បើតាមលោករដ្ឋមន្ត្រីសុខាភិបាលប៊ែលហ្ស៊ិក គឺអ្នកដំណើរនោះ ត្រូវបានគេធ្វើតេស្តនៅថ្ងៃទី២២វិច្ឆិកា ដោយធ្វើដំណើរមកពីអេហ្ស៊ីប ប្តូរយន្តហោះនៅតួកគី មុននឹងមកដល់ប៊ែលហ្សិក នៅថ្ងៃទី១១វិច្ឆិកា។ ដូច្នេះវាអាចមានន័យថា កូវីដអូមីក្រុង អាចមានវត្តនៅប៊ែលហ្សិក នៅតួកគី និងនៅអេហ្ស៊ីប ច្រើនករណីទៀត។ មិនទាន់អាចសន្មត់ច្បាស់ថា កូវីដអូមីក្រុង អាចបង្កគ្រោះថ្នាក់ខ្លាំង រដ្ឋមន្ត្រីក្រសួងសុខាភិបាលអាហ្វ្រិកខាងត្បូង បានរិះគន់ថា វិធានការបិទខ្ទប់ អ្នកដំណើរក្នុងពេលនេះ វាគឺខ្លាំងជ្រុលពេកហើយ មិនសមហេតុផលទេ។ ពោលគឺវាជាវិធានការ ដែលធ្វើឡើង ដោយស្មារតីភ័យផ្អើលឈូរឆ ជ្រុលហួសហេតុ ហើយដែលអាចធ្វើឲ្យមានផលវិបាក ទៅលើអាហ្វ្រិកខាងត្បូង មិនថាក្នុងវិស័យសេដ្ឋកិច្ច ទេសចរណ៍ និងពាណិជ្ជកម្ម។ តែយ៉ាងណាក៏ដោយ ប្រទេសភាគច្រើន បានដកបទពិសោធន៍ជាមួយនឹងកូវីដបំប្លែងខ្លួន បន្តបន្ទាប់គ្នា ប្រមាណជិត២ឆ្នាំមកនេះ ដែលបង្ខំឲ្យគេត្រូវតែប្រយ័ត្នឲ្យបានខ្ពស់ ជាជាងធ្វេសប្រហែស។ គេសុខចិត្តធ្វើឲ្យតឹងតែងសិន ចាំបន្ធូរនៅពេលក្រោយវិញ នៅណាដែលអាចដឹងប្រាដកថា វាមិនសូវធ្ងន់ធ្ងរខ្លាំង។ មួយវិញទៀត អំឡុងពេលនេះ នៅអឺរ៉ុប និងនៅអាមេរិកជាដើម កំពុងតែមានរលកឆ្លងរាលដាល ស្ទុះឡើងខ្លាំង ជាថ្មីម្តងទៀតរួចទៅហើយ ហើយយុទ្ធនាការចាក់វ៉ាក់សាំង ដូសជំរុញ ទើបតែចាប់ផ្តើមប៉ុណ្ណោះ។ ដូច្នេះ គេមិនអាចបណ្តោយឲ្យមានកូវីដបំប្លែងខ្លួនថ្មីមួយទៀត ចូលមកបន្ថែមបញ្ហាបានទេ បើទោះបីគេមិនទាន់ដឹងច្បាស់ ថាវាគ្រោះថ្នាក់កម្រិតណាក៏ដោយ។ គិតមកត្រឹមពេលនេះ គឺមិនទាន់អាចសន្មត់បានទេ ថាកូវីដអូមីក្រុងនេះ វាមានកម្លាំងឆ្លងរាលដាលខ្លាំងកម្រិតណា ហើយអាចបង្កហានិភ័យ ធ្វើឲ្យអ្នកដែលឆ្លងវាប្រឈមនឹងគ្រោះថ្នាក់ដល់ជីវិតកម្រិតណា។ អ្នកជំនាញអះអាងថា គេត្រូវការពេលវេលា យ៉ាងហោច ២ ទៅ៣សប្តាហ៍ទៀត ដើម្បីតាមដានចំណុចទាំងអស់នេះ។ ក៏ប៉ុន្តែ យោងតាមក្រុមអ្នកជំនាញ របស់អង្គការសុខភាពពិភពលោក បានឲ្យដឹងថា បើពិនិត្យលើទិន្នន័យវិភាគ ក្នុងពេលបឋមនេះ គឺវាអាចទៅរួច ដែលកូវីដបំប្លែងខ្លួន អូមីក្រុងនេះ « អាចបង្កហានិភ័យខ្ពស់ ធ្វើឲ្យអ្នកជំងឺ អាចឆ្លងច្រើនដង »។ មេរោគបំប្លែង នៅក្នុងខ្លួនអ្នកជំងឺកូវីដដែលជាមិនដាច់ យោងតាម លោក Etienne Simon-Lorière អ្នកជំនាញផ្នែកមេរោគនៅវិទ្យាស្ថាន ប៉ាស្ទ័របារាំង បានឲ្យដឹងថា កូវីដអូមីក្រុងនេះ វាទំនងជាបានបំប្លែងខ្លួន ផ្លាស់ប្តូរអាស៊ីតអាមីណេចំនួនយ៉ាងហោច៣ប្រភេទ ស្ថិតនៅក្នុងចំណុចសំខាន់មួយនៃកោសិកាមេរេោគ។ ចំណុចនេះ គឺជាចំណុចដែល ប្រព័ន្ធអង់ទីក័ររបស់រាងកាយមនុស្សយើង ចូលទៅវាយលុក។ ដូច្នេះបើចំណុចនេះ មានការផ្លាស់ប្តូរខ្លាំង គឺអង់ទីក័រយើង ដែលស្គាល់តែអាមេរោគចាស់ គឺមិនអាចទៅវាយលុកឈ្នះទេ។ អ្នកជំនាញរូបនេះ សង្ស័យថា គឺហេតុដូច្នេះហើយ បានជាកូវីដអូមីក្រុង អាចគេចផុត ពីប្រព័ន្ធការពារខ្លួនរបស់មនុស្សយើង។ នេះគឺជាចំណុចគួរឲ្យបារម្ភមួយ។ ចំណុចគួរឲ្យបារម្ភមួយទៀត គឺកម្លាំងឆ្លងរាលដាលរបស់វា ប្រហែលជាអាចលឿន។ កាលពីខែតុលា ករណីរកឃើញវិជ្ជមានថ្មីនៅអាហ្វ្រិកខាងត្បូង មានប្រហែលជា៣០០ករណី ក្នុងមួយថ្ងៃជាមធ្យម។ តែនៅថ្ងៃទី២៥វិច្ឆិកា ស្រាប់តែឡើង ដល់ទៅ២៥០០ករណីវិជ្ជមានថ្មី។ ការឡើងលឿន វាជួនចំពេលដែលគេទើបតែរកឃើញកូវីដអូមីក្រុងនេះតែម្តង។ ហើយឆ្លងកាត់ការពិនិត្យវិភាគ គេឃើញមានករណី កូវីដអូមីក្រុងនេះ ចំនួនជាង៦០ករណី តែភាគច្រើនសឹងតែ៩០% គឺមានទីតាំងស្ថិតនៅតែតំបន់តែមួយទេ គេតំបន់ Gauteng ដែលជាខេត្តស្ថិតនៅភាគខាងជើងអាហ្វ្រិកខាងត្បូង។ លោក Alex Sigal អ្នកជំនាញនៅវិទ្យាស្ថានស្រាវជ្រាវមេរោគអាហ្វ្រិកខាងត្បូងបាន លើកឡើងថា បើតាមការសង្ស័យ កូវីដអូមីក្រុងនេះ ប្រហែលជាងអាចបំលែងខ្លួនចេញពីអ្នកជំងឺដែលបានឆ្លងកូវីដ តែជាមិនដាច់ ដោយមានមេរោគជាប់សំងំក្នុងខ្លួន។ ការព្យាបាលមិនបានដឹតដល់ បានធ្វើឲ្យអ្នកជំងឺបែបនេះ ធ្លាក់ខ្លួនឈឺធ្ងន់ម្តងទៀត ហើយមេរោគវាអាចបំលែងខ្លួនថ្មី។ លោក Darren Martin អ្នកជំនាញនៅសកលវិទ្យាល័យអាហ្វ្រិកខាងត្បូង ក៏អះអាងដូចគ្នានេះដែរ។ ដោយឡែក អ្នកជំនាញ ក៏កំពុងពិនិត្យតាមដានដែរ អំពីករណីជល់គ្នា រវាងមេរោគកូវីដ ជាមួយនឹងមេរោគជំងឺអេដស៍។ អាហ្វ្រិកខាងត្បូង ជាប្រទេសដែលមានអ្នកផ្ទុកមេរោគ HIV ច្រើនជាងគេបំផុត ហើយការទទួលបានថ្នាំព្យាបាល ឲ្យបានត្រឹមត្រូវវិញ គឺមានកម្រិតទាបណាស់។ អ្នកជម្ងឺអេដស៍ ដែលមានប្រព័ន្ធការពារខ្លួនខ្សោយ អាចគ្មានលទ្ធភាពជាសះស្បើយ ឬទប់ជាមួយកូវីដបាន ធ្វើឲ្យមេរោគសំងំ បំលែងខ្លួនប្លែកថ្មី ហើយសាហាវជាងមុន។ ហើយជាងនេះទៀត កម្រិតចាក់វ៉ាក់សាំងបង្ការកូវីដនៅអាហ្វ្រិកខាងត្បូង ក៏ទាបខ្លាំងដែរ មានប្រមាណតែ ២៣%តែប៉ុណ្ណោះ៕11/27/20218:07
- ព្រឹត្តិការណ៍អន្តរជាតិប្រចាំថ្ងៃ - តើពិភពលោកគួរព្រួយបារម្ភនឹងមេរោគកូវីដបំប្លែងខ្លួនថ្មីដែលទើបលេចរូបរាងនៅអាហ្រ្វិកខាងត្បូងដែរ ឬទេ?នៅថ្ងៃសុក្រ ទី២៦ វិច្ឆិកា សហភាពអឺរ៉ុប រួមទាំងប្រទេសមួយចំនួនបានប្រកាសព្យួរជើងហោះហើរទៅ និងមកជាមួយប្រទេសអាហ្រ្វិកខាងត្បូង រួមទាំង ៥ប្រទេសអាហ្វ្រិកផ្សេងទៀត។ មូលហេតុ គឺមកពីអាហ្រិ្វកខាងត្បូងទើបរកឃើញមេរោគកូវីដបំប្លែងខ្លួនថ្មីមួយទៀតដែលមានអត្តសញ្ញាណ B.1.1.529។ អង្គការសុខភាពពិភពលោក WHO បានប្រកាសពីការតាមដានមើលលើមេរោគបំប្លែងខ្លួនថ្មីមួយនេះដោយយកចិត្តទុកដាក់ជាទីបំផុត។វត្តមានមេរោគបំប្លែងខ្លួនថ្មីបានកើតឡើង ខណៈដែលពិភពលោកកំពុងបន្តរងគ្រោះដោយមេរោគបំប្លែងខ្លួនសព្វថ្ងៃឈ្មោះ « ដែលតា »។ អង្គការសុខភាពពិភពលោកWHO នៅមិនទាន់បានដាក់ឈ្មោះឲ្យមេរោគកូវីដបំប្លែងខ្លួនថ្មីដែលទើបរកឃើញនៅអាហ្រ្វិកខាងត្បូងក្រោមអត្តសញ្ញាណ B.1.1.529នៅឡើយទេ។ អ្វីដែលគេអាចនិយាយបានចាប់ពីពេលនេះតទៅ មេរោគកូវីដបំប្លែងខ្លួនថ្មីមួយនេះនឹងត្រូវWHO ដាក់បញ្ចូលទៅក្នុងបញ្ជីឈ្មោះមេរោគកូវីដបំប្លែងខ្លួនផ្សេងទៀតដែលពិភពលោកមានសព្វថ្ងៃ ដូចជាបេតា អាល់ហ្វា ឬមួយក៏ដែលតា។ តើមេរោគកូវីដបំប្លែងខ្លួនថ្មីប្រភេទ B.1.1.529មានអត្រាឆ្លង និងគ្រោះថ្នាក់ជាងមេរោគបំប្លែងខ្លួនផ្សេង ពិសេសដែលតា ឬទេ?។ បើតាមការអះអាងរបស់ក្រុមអ្នកវិទ្យាសាស្រ្តអាហ្រ្វិកខាងត្បូង មេរោគកូវីដបំប្លែងខ្លួនថ្មីប្រភេទ B.1.1.529មានចំនួនបំប្លែងខ្លួនច្រើនមែនទែន ពោលមិនតិចជាង ៣០ដងទេ បើធៀបនឹងមេរោគកូវីដបំប្លែងខ្លួនដែលតាដែលមានចំនួនតែ ២ដងប៉ុណ្ណោះ។ តាមរយៈទិន្នន័យនេះនាំឲ្យគេយល់បានថា អត្រាឆ្លង និងអត្រាគ្រោះថ្នាក់បង្កដោយមេរោគកូវីដបំប្លែងខ្លួនថ្មីប្រភេទ B.1.1.529 គឺសហាវ ព្រោះអាចលឿន និងគ្រោះថ្នាក់ខ្លាំង។ តាមវិទ្យាស្ថានជាតិផ្នែកជំងឺឆ្លងអាហ្រ្វិកខាងត្បូង ចំនួនករណីឆ្លងថ្មី និងភាគរយនៃការធ្វើតេស្តិ៍វិជ្ជមានដោយមេរោគបំប្លែងខ្លួនថ្មីនេះកំពុងកើនឡើងយ៉ាងឆាប់រហ័ស។ គិតត្រឹមថ្ងៃសុក្រ ទី២៦ វិច្ឆិកា អាហ្រ្វិកខាងត្បូងរកឃើញករណីឆ្លងដោយមេរោគបំប្លែងខ្លួនថ្មីប្រភេទ B.1.1.529 ចំនួន ២២ករណី ពិសេសនៅលើក្រុមយុវជន។ ក្រៅពីអាហ្រ្វិកខាងត្បូង មេរោគបំប្លែងខ្លួនថ្មីនេះត្រូវបានគេរកឃើញនៅក្នុងប្រទេសបុតស្វាណាចំនួន ៤ករណី អ៊ីស្រាអែលចំនួន ១ករណី និងនៅហុងកុងចំនួន ២ករណី។ អង្គការសុខភាពពិភពលោកកំពុងតាមដាន ខណៈដែលប្រទេសខ្លះចាប់ផ្តើមចាត់វិធានការទប់ស្កាត់ នៅចំពោះមុខពេលនេះ និងដោយសារតែមេរោគបំប្លែងខ្លួនថ្មីមួយនេះនៅថ្មីថ្មោងខ្លាំងពេក អង្គការសុខភាពពិភពលោក WHO បានថ្លែងពីការបន្តតាមដានមើលយ៉ាងយកចិត្តទុកដាក់ជាទីបំផុត និងត្រូវបើកកិច្ចប្រជុំមួយនៅថ្ងៃសុក្រ ទី២៦ វិច្ឆិកាដើម្បីកំណត់ពីកម្រិតគ្រោះថ្នាក់របស់មេរោគបំប្លែងខ្លួនថ្មីនេះ។ តែលោកស្រី Maria Van Kerkhove អ្នកទទួលខុសត្រូវបច្ចេកទេសរបស់ WHO បានថ្លែងថា គេត្រូវការពេលប៉ុន្មានសប្តាហ៍ខាងមុខដើម្បីស្វែងយល់ឲ្យបានច្បាស់ពីអត្រាឆ្លង និងអត្រាគ្រោះថ្នាក់របស់មេរោគបំប្លែងខ្លួនថ្មីនេះ។ យ៉ាងណាក៏ដោយ មានប្រទេសបណ្តើរៗ ដូចជាអង់គ្លេស សិង្ហបុរី និងបារាំងបានចាត់វិធានការទប់ស្កាត់រួចជាស្រេចដោយបានប្រកាសផ្អាកជើងហៅហើរទៅ មកជាមួយអាហ្រ្វិកខាងត្បូង រួមទាំង ៥ប្រទេសអាហ្វ្រិកផ្សេងទៀតមាន ណាមីប៊ី បុតស្វាណា ឡេសូតូ ស៊ីមបាវ៉េ និងអេសវ៉ាទីនី។ ចំណែកប្រទេសផ្សេងទៀតបានប្រកាសតាមដាន និងត្រៀមខ្លួនធ្វើដូចគ្នានេះ បើចាំបាច់។ គួរបញ្ជាក់ថា អាហ្រ្វិកខាងត្បូងដែលជាប្រទេសឆ្លងកូវីដ១៩ ខ្លាំងជាងគេនៅអាហ្រ្វិកបានស្គាល់សន្ទុះករណីឆ្លងថ្មីដោយមេរោគបំប្លែងខ្លួនដែលតា។ គិតត្រឹមថ្ងៃពុធ ទី២៤ វិច្ឆិកា អាហ្រិ្វកខាងត្បូងរកឃើញករណីឆ្លងថ្មីដោយដែលតាជាង ១ ២០០ករណី។ តែមិនទាន់អីផងនៅពេលនេះ ក្រុមអ្នកវិទ្យាសាស្រ្តអាហ្រ្វិកខាងត្បូងបានមើលឃើញរួចជាស្រេចពីរលកឆ្លងថ្មីពីពេលនេះទៅដំណាច់ឆ្នាំ ពិសេសដោយមេរោគបំប្លែងខ្លួនថ្មីប្រភេទ B.1.1.529។ ប្រសិទ្ធិភាពរបស់វ៉ាក់សាំងកំពុងចោទជាបញ្ហា? ខណៈនេះ គេនៅមិនទាន់ដឹងពីកម្រិតប្រសិទ្ធិភាពរបស់វ៉ាក់សាំងដែលពិភពលោកកំពុងមានក្នុងដៃសព្វថ្ងៃដើម្បីបង្ការទប់នឹងមេរោគបំប្លែងខ្លួនថ្មីប្រភេទ B.1.1.529 នៅអាហ្រ្វិកខាងត្បូងពេលនេះទេ។ តែប្រឈមនឹងករណីបំប្លែងខ្លួនក្នុងចំនួនច្រើនខ្លាំងរបស់មេរោគថ្មីប្រភេទ B.1.1.529មួយនេះ ក្រុមអ្នកវិទ្យាសាស្រ្តបានបារម្ភរួចជាស្រេចពីប្រសិទ្ធិភាពតិចតួចរបស់វ៉ាក់សាំងបច្ចុប្បន្ន។ កុំថាឡើយមេរោគបំប្លែងខ្លួនថ្មីពេលនេះ សូម្បីតែមេរោគបំប្លែងខ្លួនដែលតាដែលកំពុងធ្វើចរាចរណ៍ក្នុងលោកសព្វថ្ងៃក៏វ៉ាក់សាំងបច្ចុប្បន្នពិបាកទប់ទល់ដែរ។ « អ្វីដែលធ្វើឲ្យយើងបារម្ភ គឺមេរោគបំប្លែងខ្លួនថ្មីប្រភេទ B.1.1.529 នេះមិនត្រឹមតែមានសមត្ថភាពចម្លងខ្លាំងប៉ុណ្ណោះទេ តែវាក៏មានសមត្ថភាពក្នុងការពង្វាងប្រព័ន្ធភាពស៊ាំខ្លះរបស់យើងដែរ » នេះជាការថ្លែងរបស់អ្នកវិទ្យាសាស្រ្តអាហ្រ្វិកខាងត្បូងម្នាក់លោក Richard Lessells។ ជាទូទៅ ក្រុមអ្នកវិទ្យាសាស្រ្តអាហ្រ្វិកខាងត្បូងកំពុងមានមន្ទិលសង្ស័យលើប្រសិទ្ធិភាពវ៉ាក់សាំងសព្វថ្ងៃក្នុងការបង្ការមេរោគបំប្លែងខ្លួនថ្មីប្រភេទ B.1.1.529។ គ្រប់គ្នាកំពុងរង់ចាំមើលថា តើមេរោគបំប្លែងខ្លួនថ្មីប្រភេទ B.1.1.529 នឹងវិវត្តទៅយ៉ាងម៉េច និងថា តើវ៉ាក់សាំងដែលពិភពលោកកំពុងមានក្នុងដៃសព្វថ្ងៃអាចបង្ការមេរោគបំប្លែងខ្លួនថ្មីមួយនេះបានកម្រិតណាដែរ៕11/26/20216:36
- ព្រឹត្តិការណ៍អន្តរជាតិប្រចាំថ្ងៃ - សោកនាដកម្មស្លាប់ជនអន្តោប្រវេសន៍នៅច្រកសមុទ្របារាំងនិងអង់គ្លេស៖ តើជាកំហុសអ្នកណា?បារាំងនឹងមិនបណ្តោយឲ្យច្រកសមុទ្រLa Manche ដែលស្ថិតនៅចន្លោះព្រំដែនបារាំង និងអង់គ្លេសក្លាយជាវាលកប់ខ្មោច។ នេះជាប្រសាសន៍របស់ប្រធានាធិបតី បារាំង លោកអេម៉ានុយអែល ម៉ាក្រុង នៅប៉ុន្មានម៉ោងក្រោយ កើតមានសោកនាដកម្ម លិចទូកដឹកជនអន្តោប្រវេសន៍ បានសម្លាប់មនុស្ស២៧នាក់។ ឧប្បត្តិហេតុនេះបានកើតមានឡើង ក្រោយពីជនអន្តោប្រវេសន៍ ជាច្រើននាក់ ក្នុងនោះ មានស្រ្តីនិងកុមារ បានជិះទូកពោង ផ្សងសំណាង ឆ្ពោះទឹកដីអង់គ្លេសកាលពីថ្ងៃពុធទី ២៤វិច្ឆិកា ២០២១។ ច្រកសមុទ្របារាំង ជាមួយព្រំដែនអង់គ្លេស ក្លាយជាកន្លែងកប់ខ្មោចជនអន្តោប្រវេសន៍បន្ទាប់ពី សមុទ្រមេឌីទែរ៉ាណេ? បារាំង និងអង់គ្លេសបានសំដែងការរន្ធត់ នៅក្រោយ កើតមានសោកនាដកម្ម ស្លាប់ជីវិតជនអន្តោប្រវេសន៍ ជាច្រើននាក់ នៅច្រកសមុទ្ររវាងបារាំង និងអង់គ្លេស កាលពីថ្ងៃពុធម្សិលមិញ។ តាមរដ្ឋមន្រ្តីក្រសួងមហាផ្ទៃបារាំង ជនអន្តោប្រវេសន៍ ២៧នាក់ ដែលនៅក្នុងនោះមាន ៧នាក់ ជាស្រ្តី និង៣នាក់ជាកុមារ បានលង់ទឹកស្លាប់ នៅក្នុងពេលធ្វើដំណើរតាមទូកពោង ផ្សងសំណាងសំដៅទឹកដីអង់គ្លេស។ តាមអាជ្ញាធរបារាំង ជនរងគ្រោះភាគច្រើនជាជនជាតិគួដ មកពីអ៊ីរ៉ាក់ និងអ៊ីរ៉ង់។ ចំណែកជនរងគ្រោះពីរនាក់ដែលនៅរស់ និងកំពុងព្យាបាលនៅមន្ទីរពេទ្យ នៅក្រោយស្រង់ចេញពីក្នុងទឹក មានម្នាក់ជាជនជាតិអ៊ីរ៉ាក់ និងម្នាក់ជាជនជាតិស៊ូដង់។ នៅក្នុងប្រវត្តិឆ្លងដែនខុសច្បាប់ពីបារាំង ទៅអង់គ្លេស នេះជាលើកទី១ ហើយ ដែលជនអន្តោប្រវេសន៍ស្លាប់ក្នុងចំនួនដ៏ច្រើន បែបនេះ។ ចាប់តាំងពីដើមឆ្នាំ ២០២១ រហូតដល់មុន សោកនាដកម្ម កាលពីថ្ងៃពុធ គេរាប់ឃើញ មានជនអន្តោប្រវេសន៍ ៧នាក់ ប៉ុណ្ណោះ ដែលស្លាប់ និងបាត់ខ្លួន នៅក្នុងពេលជិះទូកពោង ផ្សងសំណាង សំដៅទឹកដីអង់គ្លេស។ នៅថ្ងៃពុធ ប្រធានាធិបតីបារាំង និងនាយករដ្ឋមន្រ្តីអង់គ្លេស បាននិយាយគ្នាតាមទូរស័ព្ទ និងសន្យាពង្រឹងការសហការដើម្បីប្រយុទ្ធប្រឆាំងបណ្តាញក្រុមឈ្មួញជួញដូរតាមផ្លូវសមុទ្រពីបារាំង ទៅអង់គ្លេស។ តាមរដ្ឋមន្រ្តីអង់គ្លេសទទួលបន្ទុក អន្តោប្រវេសន៍ លោក Tom Pursglove ឆ្លៀតឱកាសជួបសន្ទនាជាមួយប្រធានាធិបតីបារាំង លោកនាយករដ្ឋមន្រ្តីអង់គ្លេសបានស្នើឡើងជាថ្មី ការចូលរួមរបស់ប៉ូលិសអង់គ្លេស ក្នុងការដើរល្បាត ជាមួយប៉ូលិសបារាំង នៅតាមឆ្នេរសមុទ្របារាំង ក្នុងគោលដៅទប់ស្កាត់ទាន់ពេលវេលាកុំឲ្យទូកដឹកជនអន្តោប្រវេសន៍អាចចុះទឹកសមុទ្រ សំដៅប្រទេសអង់គ្លេស។ បារាំង ធ្លាប់បានបដិសេធសំណើរបស់ភាគីអង់គ្លេសក្នុងហេតុផល បូរណភាពដែនដីរបស់បារាំង។ នៅក្នុងបទសម្ភាសន៍ជាមួយទូរទស្សន៍អង់គ្លេស នាយករដ្ឋមន្រ្តីអង់គ្លេសបានសំដែងការសោកស្តាយ និងចង្អុរដាក់រដ្ឋាភិបាលបារាំង ថា ទោះទទួលបានប្រាក់ជំនួយ ពីអង់គ្លេស ប្រមាណ ៦០លានអឺរ៉ូ សម្រាប់ឆ្នាំ ២០២១ ដល់ឆ្នាំ ២០២២ បារាំង នៅតែធ្វើការមិនបានគ្រប់គ្រាន់ដើម្បីរារាំង ទប់ស្កាត់ទូកដឹកជនអន្តោប្រវេសន៍ខុសច្បាប់។ តាមភាគីបារាំង គិតចាប់តាំងពីដើមខែមករាឆ្នាំនេះ ជនអន្តោប្រវេសន៍ ៣១ ៥០០នាក់ បានឡើងជិះទូកចេញពីឆ្នេរសមុទ្របារាំង សំដៅប្រទេសអង់គ្លេស។ ក្នុងរយៈពេលដដែល គេស្រង់ សង្គ្រោះជីវិតមនុស្សជាង ៧៨០០នាក់។ អាជ្ញាធរអង់គ្លេសវិញថា មានជនអន្តោប្រវេសន៍ ជាង ២២ ០០០នាក់ បានឆ្លងសមុទ្រ ចូលទៅដល់ទឹកដីអង់គ្លេស។ ទូកពោង ដែលរៀបចំដោយឈ្មួញ លួចដឹកមនុស្ស ខុសច្បាប់ ភាគច្រើនចាកចេញ ពី ក្រុងCalais ភាគខាងជើងបារាំង ដែលស្ថិតនៅត្រើយម្ខាងសមុទ្រ ពីទឹកដីអង់គ្លេស តែ ៣០គីឡូម៉ែត្រប៉ុណ្ណោះ។ នៅក្រោយសោកនាដកម្ម ស្លាប់ជីវិតជនអន្តោប្រវេសន៍ ដ៏ច្រើន មិនធ្លាប់មាន កាលពីថ្ងៃពុធម្សិលមិញ ប្រធានាធិបតីបារាំង បានអះអាងហើយថា នឹងមិនបណ្តោយច្រកសមុទ្រLa Manche ក្លាយជាកន្លែងកប់ខ្មោចជនអន្តោប្រវេសន៍ ដូចសមុទ្រមេឌីទែរ៉ាណេនោះទេ។ នៅក្នុងកិច្ចសន្ទនាតាមទូរស័ព្ទ កាលពីយប់ថ្ងៃពុធ នាយករដ្ឋមន្រ្តីអង់គ្លេស បូរីស ចនសុន និងប្រធានាធិបតីបារាំង លោកអេម៉ានុយអែល ម៉ាក្រុងព្រមព្រៀងគ្នាថា បារាំងនិងអង់គ្លេស នឹងបង្កើនការប្រឹងប្រែង ដើម្បីប្រយុទ្ធប្រឆាំងបណ្តាញក្រុមឈ្មួញទុច្ចរិត ដែលជាអ្នកកេងចំណេញលុយ ដោយមិនខ្វល់ពីគ្រោះថ្នាក់ អាយុជីវិតរបស់ជនអន្តោប្រវេសន៍។ តើគេត្រូវបន្ទោសអ្នកណា? នាយករដ្ឋមន្រ្តីអង់គ្លេស និងប្រធានាធិបតីបារាំងបាននិយាយទម្លាក់កំហុសលើក្រុមជួញដូរ លួចដឹកមនុស្សខុសច្បាប់ ថា ជាអ្នកទទួលខុសត្រូវលើសោកនាដកម្ម ស្លាប់ជីវិតជនអន្តោប្រវេសន៍ នៅច្រកសមុទ្រLa Manche។ រដ្ឋមន្រ្តីក្រសួងមហាផ្ទៃបារាំងបានអះអាងថា គេបានចាប់ខ្លួនជនសង្ស័យ៥នាក់ ដែលជាប់ពាក់ព័ន្ធនឹងការលួចដឹកមនុស្សតាមទូក រហូតធ្វើឲ្យមានអ្នកស្លាប់ កាលពី ថ្ងៃ ពុធម្សិលមិញ។ តាមរដ្ឋមន្រ្តីបារាំង ក្រុមជួញដូរមនុស្ស គិតតែពីគាបយកលុយ ដោយគ្មានគិតពី គ្រោះថ្នាក់ អាយុជីវិតរបស់ជនអន្តោប្រវេសន៍។ គេវាយតម្លៃថា សម្រាប់ការឆ្លងដែនខុសច្បាប់តាទូកពីបារាំង ទៅអង់គ្លេស ឈ្មួញជួញដូរបានទារពីជនអន្តោប្រវេសន៍ ពី ២ពាន់ ទៅ ៧ពាន់អឺរ៉ូ។ ទាក់ទងនឹងក្រុមជួញដូរមនុស្ស រដ្ឋមន្រ្តីមហាផ្ទៃបារាំង បាននិយាយថា បារាំង បានប្រឹងប្រែង ប្រយុទ្ធប្រឆាំងនិងចាប់បានឈ្មួញជួញដូរមនុស្ស១៥០០នាក់។ ប៉ុន្តែ យ៉ាងណាក៏ដោយ ការប្រឹងប្រែងរបស់បារាំងតែម្នាក់ មិនអាចទប់ទល់ឈ្នះ បណ្តាញជួញដូរមនុស្ស ដែលមួយចំនួនមកពីប្រទេសអឺរ៉ុបផ្សេងទៀតនោះទេ។ ត្រង់ចំណុចនេះ រដ្ឋមន្រ្តីបារាំង បានអំពាវនាវឲ្យមានការសហការពីប្រទេសជិតខាង ដូចជាប៊ែលហ្សិក ហូឡង់ និងអាល្លឺម៉ង់ដើម្បីចែករំលែកព័ត៌មាន ជាមួយបារាំង ដើម្បី បំផ្លាញ សំបុក បណ្តាញ ក្រុមទុច្ចរិត ដែលរៀបចំ ដឹកជនអន្តោប្រវេសន៍ខុសច្បាប់ ចេញពីទឹកដី បារាំង សំដៅអង់គ្លេស តើនេះជាកំហុសរបស់ក្រុមឈ្មួញជួញដូរមនុស្ស? ទាំងបារាំងនិងអង់គ្លេស ទម្លាក់កំហុសលើក្រុមឈ្មួញជួញដូរមនុស្ស ព្រោះភាគីនីមួយៗមិនចង់ទទួលខុសត្រូវ ចូលរួមធ្វើឲ្យជនអន្តោប្រវេសន៍ស្លាប់នោះទេ។ ប៉ុន្តែ បើគេមើលឲ្យស៊ីជម្រៅ បើទោះបីជាអាជ្ញាធរជោគជ័យ បំផ្លាញបានសម្រេច បណ្តាញឈ្មួញជួញដូរមនុស្ស ប៉ុន្តែ គេមិនអាចទប់ស្កាត់លំហូរជនអន្តោប្រវេសន៍ នោះទេ។ បញ្ហាដើមចម របស់វាទាក់ទងនឹងបញ្ហានយោបាយអន្តោប្រវេសន៍របស់សហភាពអឺរ៉ុប ជាពិសេស បារាំងនិងអង់គ្លេស ដែលជាអ្នកពាក់ព័ន្ធផ្ទាល់ក្នុងរឿងនេះ។ តាមសមាគម អង្គការជួយសង្រ្គោះ ច្រកសមុទ្រLa Manche តាំងពីដើមឆ្នាំ ចំនួនជនអន្តោប្រវេសន៍ដែលប៉ុនប៉ង ឆ្លងដែនខុសច្បាប់ចូលទៅអង់គ្លេស តាមមធ្យោបាយ ទូកពោង មានចំនួនកាន់តែច្រើន។ ជនអន្តោប្រវេសន៍បានយកជម្រើសធ្វើដំណើរតាមទូកពោង ជាជាជម្រើសចុងក្រោយ ដើម្បីលួចឆ្លងដែនខុសច្បាប់ទៅអង់គ្លេស នៅបន្ទាប់ពី អង់គ្លេស និងបារាំង បានរឹតបន្តឹងកាន់តែខ្លាំងការត្រួតពិនិត្យ លំហូរជនអន្តោប្រវេសន៍ តាមព្រំដែនផ្លូវគោក។ គេវាយតម្លៃថា បើសិនអាជ្ញាធរបារាំង យល់ព្រមផ្តល់សិទ្ធិជ្រកកោនដល់ជនអន្តោប្រវេសន៍ ហើយអង់គ្លេស យល់ព្រម បើកផ្លូវ ឲ្យជនអន្តោប្រវេសន៍ចូលទៅសុំសិទ្ធិជ្រកកោន ដោយសន្តិវិធី នោះ ក៏គ្មានកើតមានសោកនាដកម្ម គ្មាន ជនអន្តោប្រវេសន៍ដែលផ្សងព្រេង ធ្វើដំណើរតាមទូក ពោង ដែលគ្មានសុវត្ថិភាពដែរ។ តាមស្ថាប័នអន្តោប្រវេសន៍អង់គ្លេស ជាង៩០%នៃជនអន្តោប្រវេសន៍ ដែលបានលួចឆ្លងដែនខុសច្បាប់ ទៅដល់ទឹកដីអង់គ្លេស បានដាក់ពាក្យសុំសិទ្ធិជ្រកកោននៅអង់គ្លេស។ បញ្ហាមិនមែនមកពីក្រុមឈ្មួញជួញដូរមនុស្សតែមួយមុខទេ។ គ្មានឈ្មួញសម្រាប់ជួយដឹកខុសច្បាប់ ទៅអង់គ្លេស ក៏ជនអន្តោប្រវេសន៍ ដែលមួយចំនួន ដែលមានប្រភពមកពីប្រទេសអ៊ីរ៉ាក់ អ៊ីរ៉ង់ ស៊ីរី និងយេម៉ែន ប៉ងចង់ទៅរស់នៅ នៅអង់គ្លេស ក៏នៅតែព្យាយាម រកគ្រប់មធ្យោបាយ ដើម្បីជិះទូក ឆ្លងសមុទ្រខុសច្បាប់ ទៅអង់គ្លេស។ សម្រាប់សកម្មជនការពារសិទ្ធិជនអន្តោប្រវេសន៍ ដំណោះស្រាយដើម្បីជៀសផុតសោកនាដកម្មស្លាប់ជនអន្តោប្រវេសន៍ នៅច្រកសមុទ្រ បារាំងអង់គ្លេស មានតែមួយ គឺ រដ្ឋាភិបាលអង់គ្លេស ត្រូវសម្រួល បើកផ្លូវ ឲ្យជនអន្តោប្រវេសន៍ ធ្វើដំណើរស្របច្បាប់ ចូលទៅសុំសិទ្ធិជ្រកកោន។ ការរឹតបន្តឹងព្រំដែន មិនមែនជាដំណោះស្រាយនោះទេប៉ុន្តែ ផ្ទុយទៅវិញ វានឹងជំរុញឲ្យឈ្មួញជួញដូរមនុស្សអាចកេងចំណេញលុយ ពីជនអន្តោប្រវេសន៍ ដែលបានប្តេជ្ញាហើយថា នឹងធ្វើដំណើរទៅរស់នៅប្រទេសអង់គ្លេសឲ្យបាន បើទោះបីជាពួកគេត្រូវចំណាយលុយ និងប្រថុយគ្រោះថ្នាក់ជីវិតប៉ុណ្ណាក៏ដោយ៕11/25/20216:55
Über ព្រឹត្តិការណ៍អន្តរជាតិប្រចាំថ្ងៃ
Hören Sie ព្រឹត្តិការណ៍អន្តរជាតិប្រចាំថ្ងៃ, ព្រឹត្តិការណ៍កម្ពុជាប្រចាំថ្ងៃ und viele andere Radiosender aus aller Welt mit der radio.at-App
ព្រឹត្តិការណ៍អន្តរជាតិប្រចាំថ្ងៃ
Jetzt kostenlos herunterladen und einfach Radio & Podcasts hören.
ព្រឹត្តិការណ៍អន្តរជាតិប្រចាំថ្ងៃ: Zugehörige Podcasts
ព្រឹត្តិការណ៍អន្តរជាតិប្រចាំថ្ងៃ: Zugehörige Sender
Wegen Einschränkungen Ihres Browsers ist dieser Sender auf unserer Website leider nicht direkt abspielbar.
Sie können den Sender alternativ hier im radio.at Popup-Player abspielen.
